LEUTJE MAAID
Kovviekringen op kraant, swaarde
vingers op deuren, houk van baank
daipweg immekoar zeten, niks
opschud, aal hangen, aal
stinken noar braand.
Computerschaarm groeterg,
in reten van toetsenbord ales tabak,
vlouerklaid dijkaant koamer net zo
slim, koal versleten, aaske-
graauw.
Wat zel je in t ind as ain van de twij
lampen t nog dut, wat noar dokter
as pien mor verschut en wat klok
op te hoalen as tied zo al
haard genog lopt
Blief nog, wat zel ik
domt in opklopte koamer allain,
leutje maaid van Jan Stain,
k wait mor naauw woar of
kovviebus staait.
... Vandaag ontvangt de Groningse dichteres Nina Werkman de Literaire Pries van Stichting t Grunneger Bouk ...
Schrijver: Nina WerkmanInzender: Redactie, 22 februari 2013
Geplaatst in de categorie: huwelijk